Author: ОМ ЦЕНТАР ЗА КОМУНИКАЦИЈА

Раде Милосовски: Груевски и Мијалков ја уништија ВМРО-ДПМНЕ со нивните антидржавни дејствувања

Со резигнираност ги одбиваме обвинувањата на Сашо Мијалков дадени во интервјуто за Македонски весник, во кое користејки класичен спин, се обидува да ги дискредитира лидерите на ВМРО-Народна партија и Обединети за Македонија, г. Љубчо Георгиевски и г. Љубе Бошкоски.

Во Интервјуто во кое го деградира актуелното раководство на ВМРО-ДПМНЕ, човекот кој е креатор токму на политиката и начинот на владеење, која сега ја критикува, се обидува да наметне неточни податоци, злоупотребувајќи го авторитетот на САД и состојбата во нашата држава во пост воениот период после 2001-ва година.

Имено, тој вели: „Само Љубчо Георгиевски бил полош од него во 2002 година, кога освои 300.000 гласови, а тогаш и тој и Љубе Бошкоски беа на црната листа на САД, a позади себе имаа шверц на цигари, нафта,убиства и куп други афери.”

Јавноста знае и памети дека овие инсинуации во никој случај не може да бидат на адреса на Георгиевски и Бошкоски, туку такви квалификации може да си ги упати само себе лично.

Ние, како партија не навлегуваме во внатрешните проблеми и оценка за работење на ВМРО-ДПМНЕ, уште помалку во анализа на нечии, според нас, нарачани интервјуа, за да се креира одредено јавно мислење за таа партија и нејзиното актуелно раководство.

Нашата реакција е со цел, во старт да се пресечат обидите да се минимизира победата на двоецот Георгиевски – Бошкоски, кои се синоним за очувување на вмровската идеја, и кои и во 2016-та, и на последните избори, ја поразија политиката која ја всадија токму тој со неговиот братучед, за кои има отворени серозни обвиненија за криминал и злоупотреба на функција. Како партија, со целосна одговорност, тврдиме дека претходното раководство на ВМРО-ДПМНЕ, предводено од Груевски и Мијалков, ја уништија ВМРО-ДПМНЕ со нивните антидржавни дејствувања.

 

Со почит,

Генерален секретар на Обединети за Македонија

Раде Милосовски

Интервју со Претседателот Бошкоски за НАСЛОВНА: Македонија е татковина на сите нас, и нема тука ништо спорно

Линк до интервјуто: http://naslovna.mk/2020/07/11/Интервју-со-Љубе-Бошкоски-Во-моментов/?fbclid=IwAR10oimggz87HgRN9BhaGTmnAM0F0ZuVnaocEj5tFDJnl1ttwdbQCVdLL18

Насловна: Господине Бошкоски, на овие избори сте дел од коалицијата Можеме, која ја предводи Социјалдемократскиот Сојуз на Македонија, а вие сте составен дел со Обединети за Македонија. Kако една десничарска партија се пронајде во концептот Едно општество за сите на Заев?

Бошкоски: Ние како партија десно од центарот, со јасна ВМРО-вска провиниенција, како Обединети за Македонија, се залагаме за Македонија на сите граѓани. Ако тргнеме и од историско ВМРО, па до Крушевскиот манифест 1903-та, повикот до Албанците, Турците, Власите… е повик на едно општество за сите граѓани.

Или, начелата на АСНОМ… Јас не гледам никаков проблем во тој повик и тие начела. Напротив. Македонија е татковина на сите нас, и нема тука ништо спорно. Спорен е, според некои квазипатриоти, приодот во државното уредување. Како од македонската, така и од се погласната албанска политичка провинциенција.

Со лицемерни политики, не можеме да градиме општество чии корени датираат и се запишани во двата Илиндена. Тоа е запишано и во Статутот на Обединети за Македонија. Ние едноставно, го поддржуваме концептот, кој ете го заговара и реализира Заев.

Ние, всушност го реализираме нашиот концепт. А нели е хипокризија, во ова модерно време, во 21-ви век, да не се залагаме, сите заедно, за таков концепт. Сеедно која партија ке го прогласи за свој изум. Нема тука авторски права. Има само свесност дека треба да се гледа напред.

Штета што и во партијата ВМРО – ДПМНЕ не го гледаат или не го сакаат тоа. Но тоа е нивен проблем. Кај нив не гледам наследници на вмровската идеа.

Насловна: Назад кон вашето политичко минато. На македонската политичка сцена, граѓаните ве помнат во периодот од 1998 година, кога станувате заменик директор на Дирекцијата за безбедност и контраразузнавање, па станувате државен секретар при МВР, и на крај во Широката коалиција сте и министер на целиот ресор. Од каде Бошкоски во безбедносните структури?

Бошкоски: Така одлучи тогашниот премиер, а времето покажа дека во најтешкото време за нашата држава, јас успешно го менаџирав ова министерство. Од оваа дистанца, верувајте, би ги превзел повторно истите чекори. Македонија не се сака само на зборови. Македонија се сака со дела.

Јас никогагаш не сум барал мојата држава да направи нешто за мене. Сум се залагал јас да направам нешто за својата држава. Тоа впрочем беа и зборовите на Џон Кенеди, кој ги повика Американците да им служат на своите сонародници пред заканите од другите делови на светот, за време на неговиот инаугуративен говор од 1961 година. Со тој негов повик, тој бараше начин за да обезбеди поплоден живот за целото човештво. Далеку од тоа да се споредувам со него, но таа негова максима сум ја применувал и до ден денешен ја применувам.

И препорачувам сите да си го постават тоа прашање, еве сега кога ке излезат да гласаат на предвремените избори. Лесно е да се сруши, особено ако некој друг изградил. Треба да доградуваме и надградуваме. Македонија го заслужува тоа, и ние како нејзини совесни граѓани.

Насловна: ВМРО – ДПМНЕ и вие. Приказна која траеше можеби до вашата кандидатура за Претседател во 2004 година. Освен приказната дека ДИК ви најде маана дека немате исполнето услов од 15 години непрекинато живеење во државата, каде беше вашата матична партија која тогаш беше во распад или форма на реорганизација?

Бошкоски: Не 15, туку 10 години. Но тоа не се однесуваше за граѓани од бившите републики на СФРЈ. Уставна одредба, која се прекрши врз мене, иако беше додадена, за да може првиот претседател Глигоров да се кандидира, бидејќи беше со Белградска лична карта. Мојата матична партија не застана зад мене, сигурно од истите причини како и 2009 година.

Можам да кажам дека ми е жал што некои луѓе од таа партија, имаат ситнопартиски интереси и водат политика само ним позната. Да бидеме искрени, таа партија, не е онаа нашата ВМРО – ДПМНЕ. Претпоставувам, дека се работи за суети и лични фрустрации, особено кога сум јас во прашање. Овој го кажувам без лажна скромност.

На прсти можат да се избројат таму луѓе кои заслужуваат да се нарекуваат вмровци. дпмнеовци, да. Иако, и оваа кратенка значи повик за демократија и единство. Што пак укажува дека и вториот дел од името го оскрнавиле.

Верувајте, немам никаква горчина кон таа партија. Сепак била моја матична партија. И, ако се најдат луѓе, со кои мојата вмровска опција нема да биде загрозена, туку ќе се доразвива, како и концептот Македонија да биде таткoвина на сите, не би имал никаков проблем за соработка. Да се бориме за Држава која нема да застане на пол пат и да се движи рикверц.

Бидејки јас и како човек сум таков. Ги негувам корените но и ја појам крошната. За да има плодови за сите што сме под таа крошна. Не сум сигурен дека таа партија го има тој капацитет. Едно е да го носиш врховистичкото бреме, кога свесно си го додал ВМРО во називот на партијата кога си ја оснивал, со цел да ја сочуваш последователноста на вековната борба за македонска држава, која македонското крило на ВМРО ја водеше. А друго е да го носиш бремето на корумпираност, бреме кое го носи актуелново ВМРО – ДПМНЕ.

Додека не се огради, додека не се надрасне, таа партија само ќе тапка во место. Но се надевам, дека ќе се случат позитивни промени и таму. Ние како Обединети за Македонија немаме комплекс да соработуваме со секој со кој ке се најдеме дека имаме иста заложба за просперитетна и европска Македонија. Но, не заложби само на зборови, туку и на дела.

Насловна: Ве нарекуваат Хашки осуденик но вие имате ослободителна пресуда. Беше ли лицемерен пречекот на Скопскиот аеродром со цела фешта која тогаш ја промовираше Никола Груевски како премиер а со тоа и ваш голем спасител?

Бошкоски: Ослободителната пресуда од Хаг е доказ дека Македонија, Владата, водела исправна политика. Дека јас како министер не сум ги прекршил конвенциите. Тоа е наш македонски успех.

Комично е ако некој верува дека спасител е тој лик. Исто така комични се и претпоставките дека поради моја неблагодарност кон тој лик, кој ете ме спасил од Хаг, замислете, ме спасил, ми се случил и затворот во Македонија. Која небулоза, кое свесно лажење.  Мојата осуда во Хаг, ќе значеше осуда на Македонија и на македонскиот народ. Тоа и тој лик добро го знае.

Македонската влада на Бучковски, да ме спаси мене од финансиски банкрот, ни ги плати адвокатските трошкови мене и на другиот обвинет, а Груевски ја продолжи обврската. Неговата влада, си го изработи својот дел, да бидам докрај искрен, за што дебело си наплати политички поени. Други се бореа и гинеа, но тој си ги собра заслугите.

Но нејсе. Политички итар излезе човекот. Со моето ослободување му се наместија коцките. А јас? Јас бев среќен дека Македонија нема да биде судена за злочин према човештвото. Сите шпекулации после тоа, излегоа од кујната на Груевски. Како и изговори, зошто не сакаше како партија да застанат зад мојата претседателска кандидатура. Си имаше други планови ликот. Јас само ќе му пречев…

Иако, јас бев тој кој излобира за негова лидерска позиција на партијата. Тој е типичен пример за народната мудрост дај му власт за да видиш каков е.

Тој не е патриот, јасно и гласно кажувам, по цена да ми се налутат сите негови обожаватели, кои за жал за Македонија, уште ги има. Но има надеж и за него, кога веќе се самонарекува патриот, а тоа е да ги врати украдените и изнесените пари, во државата. А за затворска казна за него, оставам судството, како трета власт во државата, независно од никакви притисоци, да си ја работи својата работа.

Насловна: Во 2009 година Бошкоски повторно се кандидира за Претседател. Зошто токму таа функција и зошто во втор обид?

Бошкоски: Каде денес ќе беше Македонија ако не ми ги украдоа гласовите за да не влезам во вториот круг. Јас во мојата политичка кариера вложив се, мојата страст, бескомпромисна борба, големи амбиции но и голема жртва, загрозувајќи го животот. Јас во политиката влегов без калкулации, не калкулирав однапред, тие што калкулираат не се спремни да се жртвуваат. Јас имав и имам возвишени цели, кои за мене се светост. Затоа се кандидирав.

Насловна: Во 2011 година и по аудио но и видео записите вие сте уапсени под сомнението за нелегално финансирање на изборната кампања. Видовме дека случајот беше монтиран, но прашањето е од каде таа злоба кај братучедите Груевски и Мијалков? Нели Мијалков во периодот 1998 – 2001 беше заменик министер во военото разузнавање. Што им сметаше кај Вас?

Бошкоски: Моите две победи. Таа од Хаг е посветена и вградена во темелите на територијалната целовитост и суверенитет, и слобода на нашата држава. Втората победа, во судот во Стразбур, оверена со пресудата од минатиот месец, е придонес кон демократијата како темел на слободата на сите граѓани кои се борат против неправдата, омразата и злото.

Двајцата братучеди се се, само ни приближно не се како мене. Јас сум човек кој има сила да прости и на својот џелат, а они се џелатите. И да бидам искрен со вашите читатели и со вас, не сакам да се замарам со луѓе кои се заробени во своите ега и омраза. Особено кон тој што е подобар од нив.

Насловна: Вие и од оваа неправда излегувате како невин и пуштен сте на слобода. Колкава цена лично плативте за сите хирови на ВМРО – ДПМНЕ по 2001 и од Георгиевски, особено од Груевски па сега до Мицкоски? Вредеше ли упорноста да опстанете на политичката сцена?

Бошкоски: Јас овие силни удари ги претворив во победи. Моите 11 години самотија за Македонија сигурно вредат доколку докрај се оствари мојот сон за кој продолжувам да се борам за просперитетна Македонија.

Не само обезбедување услови за материјална егзистенција на нашите граѓани, туку и подобро здравство, владеење на правото и правдата, како и образование за младите. Вредеше, ако како индивидуи и политичари го подобриме личниот интегритет, да бидеме поголеми и искрени, а не лажни патриоти.

Да работиме повеќе и попродуктивно. Да бидеме искрени и посветени верници. Да живееме чесно, за да бидеме посветени на своето семејство и држава.

Насловна: Сега сте дел од коалицијата Можеме за претстојните предвремени парламентарни избори, како човек од десничарското милје, како ја цените состојбата во ВМРО – ДПМНЕ сега и денес? Мириса за завери и очигледна промена на Мицкоски по изборите. Кои се вашите информации и видувања?

Бошкоски: Ние сме посебен политички субјект ОМ. Што ќе се случи по поразот на 15 јули, тоа ќе си одлучат во ДПМНЕ. А темата завери? Јас не верувам во наметнатите апокалиптични тези за светски заговор против Македонија.

Вистината за Македонија ја знаеме сите. Особено тие кои сакаат да ја скријат, изманипулираат и искористат за свои цели. Знам само дека во таа партија некој многу го лаже членството. Но, реков тоа се нивни работи. Кои, не би сакал да бидат и наши на начин на кој беа долги 11 години.

За среќа, тоа нема да се случи, така што можеме да бидеме спокојни. А за завери во самата партија? Претежок и пресериозен е тој збор, повеќе одговара изразот партиски местенки. Но, самите ќе си се борат и изборат со тоа.

Насловна: Назад кон актуелните избори. СДСМ на чело со претседателот Зоран Заев имаше 2.5 годишен половичен мандат во кој ги реши сите отворени прашања на национално ниво, ниво на соседните земји и не позиционираше на интернационалната мапа онаму каде и заслужуваме. Како вие гледате на нешто што можеше да се реализира за 2.5 години а стоеше 12 години владеење на ВМРО – ДПМНЕ?

Бошкоски: Можеби најдобар одговор ќе е ако ги повторам моите заложби од Претседателската кампања. На моја радост, тие заложби еве се остваруваат. На моја жал, истите тие заложби, кои ги зачна мојата бивша партија но со Георгиевски како премиер, беа деформирани и деградирани, кога после него, неискрен човек со нечесни работи ја водеше државата. Сега јавноста е отруена со реторика од типот велепредавство.

Дали? Верувајте, се ќе си дојде на свое место. Ниту Георгиевски ниту јас не градевме држава за сега да ја рушиме. Тоа би значело дека себе би се предале. Во моментов, Заев го оди нашиот пат. Затоа и го поддржуваме. Но и за СДСМ како за ВМРО – ДПМНЕ, можам да речам, дека внатрепартиските случувања се нивна работа.

Ние сме само коалиционен партнер, кој сe уште не е дел од власта. Имаме своја економска програма, за која веруваме дека ке биде поддржана и од левите сили иако сме десничари.

Насловна: Заев најави дека 2020 е година на економијата, започна Пандемијата но во некоја рака 2020 тоа и е, парите кај граѓаните не е празна фраза. Како вие го цените делувањето на Владата во услови на коронавирус, кога се формраа и економските сетови?

Бошкоски: За мене ова е успешна Влада која покажа висока свест и професионализам во најтешкото време поврзано со пандемијата. Јас сум убеден дека успесите на економски план ќе бидат најпријатно изненадување за сите наши граѓани.

Јас секогаш говорам: добро е, но може уште подобро…

Сите знаеме да бидеме генерали после битка. Во случајов се води неубава кампања, особено по социјалните мрежи, со цел да се минира авторитетот на институциите. Што може да биде погубна стратегија за сите нас. Апелирам, на свест и совест кај сите граѓани. Независно кој за кого навива или ќе гласа.

Насловна: Кои се вашите лични очекувања од новиот, веќе извесен четиригодишен мандат како рамноправен коалиционен партнер, и не чекаат ли мирни години за економско стабилизирање, дотолку и години кога ВМРО – ДПМНЕ а и ДУИ најверојатно ќе мора да се реформираат како што говорите на трибините деновиве?

Бошкоски: Силно верувам дека 4 годишниот мандат ќе донесе многу инвестиции, за кои и јас лично се ангажирам. Инвестиции кои ќе ја сменат позитивно сликата на граѓаните.

Верувам дека ќе успееме да имаме стабилна и економски навистина просперитетна држава, заедничка татковина на сите нас. И верувам дека историските работи треба да останат во историјата, која треба добро да ја знаеме, за да можеме да ја проектираме иднината.

А дали тие две партии ќе се реформираат? Па, ќе видиме…

Насловна: Зошто СДСМ и зошто Можеме?

Бошкоски: Затоа што НАТО и ЕУ се остварен и остварлив сон. Иако сме партии со различни идеологии, имаме заеднички цели.

И тука нема ништо чудно, а уште помалку спорно. Партиите не можат и не смеат да бидат над државата.

Насловна: Која е вашата анализа за излезеноста, резултатот и која е вашата порака до гласачите за 15 јули, денот на избори?

Бошкоски: Сметам дека излезноста ке биде над 50%, а победата 5 пратеници разлика во корист на коалицијата Можеме. Мојата порака е едноставна: Излезете и гласајте за себе и за вашите деца, за бројот 3.

Судот во Стразбур донесе пресуда во корист на Претседателот на ОМ, Љубе Бошкоски за случајот „Кампања“

Судот во Стразбур донесе пресуда во корист на претседателот на „Обединети за Македонија“, Љубе Бошкоски за случајот „Кампања“.

Како што се вели во пресудата, одлуката се базира врз фактите за неправедност при водење на судската постапка и неоправдано исклучување на јавноста од целиот процес како и прекршување на Законот при сослушување на заштитетниот сведок.

Судот ја задолжи државата да му исплати на Љубе Бошкоски парична отштета но и исплата на затезни камати во рок од три месеци од правосилноста на одлуката односно пресудата.

Коментар за пресудата на Судот во Стразбур, даде претседателот на Обединети за Македонија, Љубе Бошкоски:

„Ова е за мене лично голема победа и предупредување – ниедна друга власт во иднина, посебно не извршната така брутално како во режимот на Никола Груевски да се меша во судската власт.
 
Сите средства кои ќе ги добијам како отштета за неправедната робија во Идризoво ќе ги дадам во цели поврзани со правдата.
 
Очекувам оваа пресуда од Стразбур да ги иницира надлежните македонски тела кои според договорот со Стразбур мора да спроведат постапка во Македонија каде ќе бидат вклучени највисоките претставници на судската власт кои треба да му дадат одговор на Стразбур што е следниот чекор во однос на оваа пресуда.
 
Очекувам да иницираат овој монтиран судски процес да биде обновен во една праведна постапка со ослободителна пресуда.
 
Оваа пресуда на Судот за човекови права дефинитивно потврдува дека постоеше режим раководен од Никола Груевски кој ги жигосуваше политичките неистимисленици, во еден разработен систем во кој беа вклучени и учествуваа сите сегменти од општеството.
 
Почнуваше со медиумски напади и црна кампања, за да се создаде основа и оправданост кај јавноста за подоцнежната политичка и монтирана пресуда.
 
Јас ја иницирав оваа постапка во Стразбур со цел да се дојде до вистината, да се тргнат сите невистини од моето име, сите лаги кои беа изнакажани, а немав можност од затвор никогаш да реагирам и да ја кажам вистината.
 
Моите години во затвор од една деценија никаква пресуда не може да ми ги врати, ниту годините, ниту моментите без моето семејство.
 
Тоа никакви пари веќе не можат да го надополнат. Hо, мојата жртва нека биде само моја, во мене нема никаков порив за реваншизам и освета, но имам желба ова да не се повторува.
 
Јас нека бидам пример како не треба да функционира една правна држава.“ – изјави Бошкоски за А1он.

Станковски: Обратна дискриминација или соживот?

Пишува: Ѓорѓи Станковски, политичка партија Обединети за Македонија

Деновиве сме сведоци на фотографии со симболи на УЧК во општини, негативни коментари, говор на омраза, расправии и тешки зборови.

Затоа решив да пишам збор-два во врска со целава ситуација, проблемите со кои сме соочени и ќе се соочуваме во иднина, сѐ додека не фрлиме поглед кон работите од минатото, сегашноста ја искористиме за почеток на реални промени, сѐ со цел за да имаме подобра иднина.

Прво, да напоменам дека целиот овој текст не е да навреди некого и да предизвика лоши чувства кон одреден етникум. Лично имам пријатели што се етнички Македонци, Бугари, Срби, Албанци, Власи, Грци итн. Под пријатели подразбирам луѓе кои ги почитуваат или не ги почитуваат моите мислења и ставови, но секогаш сме имале и ќе имаме културна и демократска дебата-другите не се добредојдени во мојот живот.

Каде е грешката?

Грешката е во тоа што моментално се соочуваме со обратна дискриминација. Обратна дискриминација е поим чијашто дефиниција гласи: Омаловажување на мнозинството за разлика од малцинството.

Во конкретнава ситуација имаме еден парадокс: Во граѓански дом се истакнуваат симболи на сепаратистичка организација, а од друга страна истите луѓе зборуваат за соживот.

Поставување на недржавни симболи е еден пример за обратна дискриминација. Зарем другите националности коишто живеат во Македонија не се добредојдени таму? За нив вратите не се отворени или ако се отворат, ќе нема да можат да завршат работа?

Општината не е штаб на сепаратистичка организација. Општината е место каде сите функционери се избрани од народот и треба да работат за народот. Не е нивна задача да предизвикуваат непријатни чувства кон одреден етникум.

Ваквите и слични настани се очигледен пример на етнички сепаратизам и национализам врз база на етникум и немаат никаква врска со соживот.

Соживот се постигнува на еден многу едноставен начин, но навидум тежок да се постигне, бидејќи политичарите од македонскиот и албанскиот блок (еве една поделба на македонското ткиво и народ), ја искористуваат именката за подгревање на сепаратистички национализам на одреден етникум, што, се разбира, е машина за гласови.

Ситуацијата во државата воопшто не е сјајна на долгорочен план. Дури и тие најгласните деновиве, поголемиот дел од нив членови на минатата владеачка партија, молчеа во 2011 година кога се донесуваше Законот за амнестија. Уште еден пример како чувствата на народот се манипулираат за некој глас повеќе.

Кое е решението?

Како и многупати спомнато, решението е во драстична промена на начинот на перцепција на припадност кон една држава. Сите го знаеме Уставот на историското ВМРО: Без разлика на вера, националност, пол…

Како десничари, кои го почитуваат минатото, ние треба да земеме пример од организацијата која се борела за Автономија на Македонија за сите етникуми, а притоа да го очистиме застарено југословенско размислување на “народи и народности” дека само одредена групација има право на живот во државата, а другите се само “народности”.

Патриотизам е да си ја сакаш државата во која си роден, во која живееш, плаќаш данок, создаваш семејство и слично. Патриотизам не е да посакуваш да ги иселиш сите староседелци тука кои живееле и ќе живеат во комшии, во другиот дел од државата, затоа што се родиле христијани, муслимани, од друг етникум итн. Тоа не сме го одбрале ниту ние, а ниту тие, а така било од памтивек.

Решението е да се забрани истакнување на симболи од други држави и сепаратистички организации. Па нели сме за соживот? Македонското знаме е неутрално и ги претставува сите етникуми, не е симбол на одредена етничка заедница. Македонското знаме е единственото нешто што треба да стои и да се истакнува насекаде и на секоја пригода. Тоа знаме обединува. Ги обединува и тие што се од двете страни на Вардар.

Не гледам причина зошто би се истакнувале знамиња и симболи на туѓи држави во државни институции. Нели сме сите граѓани на Македонија, македонски народ, без разлика на вера, националност, пол и убедување? За некој глас повеќе ли ќе ја рушиме државата? Е тоа е соживот почитувани мои.

Едукацијата и образованието е тоа што треба да го создаде тоа чувство на припадност кон државата, злоупотребата на национализмот врз база на етникум само ќе нѐ раздели уште повеќе. Нас ни треба реален и прогресивен патриотизам, не поделби со непочитување на државното знаме – државното знаме има убав симбол – сонце – што нѐ грее сите подеднакво.

Тоа е патриотизам. Тоа е еден реален патриотизам што ќе нѐ обедини сите во оваа држава.

А секако, тоа ќе доведе до подобра селекција за вработување во јавната администрација.

Моментално имаме еден вид расизам со тоа што на одредени работни места може да аплицираат само Македонци, или само Албанци, или одреден процент од еден етникум…

Што ако некој Албанец бил поквалификуван од некој друг? Или Македонец, или Македонец што се чувствува или декларира како Бугарин, Србин… или Ром? Но не е примен затоа што некој друг етникум требало да се прими таму.

Ова е само еден пример како државниот патриотизам и љубов кон државата може да го подобри квалитетот и начинот на живот во државата.

Можеби политичарите од деведесеттите направија грешка со пристапот кон народот после ослободувањето од Југославија, со продолжување на југословенската доктрина на “народи и народности”. Тоа ќе покаже времето, а досега времето покажува дека е така…

11 години Обединети за Македонија: Постоиме за татковината!

Обединети за Македонија денес одбележува 11 години од основањето на политичката партија.

Основањето на Обединети за Македонија беше повеќе од потребно. Познати како револуционерна партија, низ годините имавме притисоци, уцени, изборни кражби и измами, прогони, монтирани судски процеси, спектакуларни апсења, протести и побуни.

Затоа, се обединивме за да ги оствариме идеалите на ВМРО и неговите идеали запишани во нејзиниот Устав: Сите сме граѓани на Македонија, без разлика на вера, националност и пол. Поради тоа станавме жестоки непријатели на партии кои се обидуваа да го злоупотребат тоа име за манипулативно-политички цели.

Одговорни пред идеалите и стварноста, бевме и останавме критичари на секој субјект, но и противници на секоја политика што не дозволува земјата да оди кон стопански развој и реформи, кон евро-атланските интеграции.

Денес македонската борба не е на леви и десни. Денес македонската борба е борба на про-НАТО и про-ЕУ субјекти против анти-НАТО и анти-ЕУ.

Затоа, Обединети за Македонија е со став дека обединувањето е решение – се додека не профункционира системот и не се создадат услови за демократизација на општеството:

1. Доследно остануваме на определбите за завршување на започнатите реформски процеси во судството.

2. Мораме во нашата држава да создадеме демократски услови, за да создадеме предуслови за фер борба на идеи меѓу левицата, центарот и десницата. Обединети за Македонија останува на својот став за промена на избирачкиот модел во една изборна единица. Само така ќе се покаже реалната желба на граѓаните.

3. Сметаме дека обезбедувањето на сите потребни предуслови за преговори на РС Македонија во ЕУ – е и останува надпарстиска цел.

4. Промовирање на европските десни вредности – Обединети за Македонија останува да се бори за промовирање на: државен патриотизам, демократски развој, духовни вредности, правна држава, слободен пазар, западен капитализам, слобода на говорот и печатот, обезбедување економско-социјална сигурност, градење на пријателство и добрососедство и др.

Нека ни е честит единаесеттиот роденден на политичката партија Обединети за Македонија!

Постоиме за татковината!

ОМ ви го честита 24 Мај – Денот на светите солунски браќа Св. Кирил и Методиј

Денес е денот кога се потсетуваме на делото на Св. Кирил и Методиј – дело кое обединува многу народи во Европа и светот, со тоа што писмото станува дел од нивната традиција и култура.

Нивната задача е пример за тоа како треба да се сака својот народ, бидејќи пишаниот збор е тој што останува и остава траг на безброј генерации по нив.

Да продолжиме да го чуваме тоа што е создадено во најтешките времиња на нашиот народ.

Затоа традиционално, Обединети за Македонија на овој ден освен честитка, како партија која го негува традиционализмот, повикува на пишување на социјалните медиуми на кирилица, со цел да се зачувува традицијата и почитта кон делото на Св. Кирил и Методиј и нивните претходници и следбеници.

За многу години!

Честитка по повод Националниот ден на Власите

Почитувани Македонски Власи,

Ми претставува особено задоволство, од името на Обединети за Македонија, да упатам честитка до припадниците на влашката заедница по повод 23 Мај, Националниот ден на Власите.

Македонските Власи, несебично низ историјата дадоа многу личности кои придонесоа за подобро македонско општество.

Ви благодариме што и вие заедно со нас, обединети, како и другите етноси во Македонија, придонесувате за нејзино развивање.

Нека заедништвото ни биде чекор напред кон подобра и просперитетна држава.

Честит Национален ден на Власите!

Со почит,
Љубе Бошкоски
Претседател на Обединети за Македонија

Ние од десницата не сме лицемерни лажговци

Деновиве гледаме како одредени функционери на СДСМ и про-опозициски портали даваат свои „видувања“ и оценки за десницата во Македонија.

Поради тоа одлучивме, како Обединети за Македонија, пред македонскиот народ да појасниме одредени ставови.

Со сета почит, но ние од десницата не сме лицемерни лажговци, ниту простаци и крадци.
Десничарската политика смета дека одреден социјален ред е пожелен и ние ја поддржуваме оваа позиција врз основа на природното и човековото право, економијата и традицијата, а како пример би ја навеле конкуренцијата во пазарните економии.

Обединети за Македонија се залага за центар-десните политичко-економски принципи и спроведување на модерен, про-западен, државен патриотизам.

Државниот патриотизам го поврзуваме со демократизацијата, конструктивните идеи и љубовта кон државата, а не манипулација и етничкиот национализам и сепаратизам.

Воздигнување на духовните вредности и достоинството на целиот македонски народ без оглед на верата и националноста е, исто така, еден од главните принципи на кои се засновува нашата партија.

Се разбира, правната држава и слободниот пазар и конкуренцијата според нас, се темелни основи на економскиот систем, како и слободата на говорот и печатот, но и зелениот конзервативизам – зачувувањето на природата, што само по себе носи и здраво потомство.

Ете, тоа се дел од нашите десничарски принципи, а не таканарачената „десница“ која е под контрола на анти-западните структури во Македонија и на истокот.

Обединети за Македонија со своите контакти со конзервативните и либерал-десничарските партии во Европа помогна во осознавање на вистината за Македонија, не само кај европските левичари, туку и кај десницата.

Лицемерите и лажговците, како што ги нарекувате, немаат никаква, ама баш никаква врска со десницата и вредностите што погорe ги наведивме.

Обединети за Македонија останува на десничарската оска во Македонија.

Но, се разбира, увидуваме дека периодов не се работи за борба меѓу левицата и десницата. Периодов е борба меѓу про-западните и анти ЕУ и НАТО структури во Македонија. Затоа сметаме дека денес политичката борба во Македонија е борба за про-НАТО и про-ЕУ структури против оние кои се против сето тоа, без оглед на политичка определба.

Кога конечно ќе се направи простор и пат за демократска борба меѓу левицата и десницата, тогаш ќе се создаде можност за демократско спротивставување на идеи кои не се штетни за државата.

Се надеваме дека ваквите ставови не се официјални ставови на СДСМ или на некоја друга политичка партија, туку дека се работи за одделни поединечни определби.

Да не заборавиме дека заедно го уривавме анти ЕУ и анти НАТО режимот во Македонија, кадешто вистинската десница имаше голем уддел во воведувањето на демократизацијата во Македонија.

27.04.2020 – Центар за комуникации на Обединети за Македонија

Честитка по повод Велигден

Љубе Бошкоски: Имам чест и задоволство, од мое лично име и од името на Обединети за Македонија, од се` срце на сите верници да им го честитам најголемиот христијански празник, Воскресението Христово – Велигден.

Ја славиме победата на доброто над злото, животот над смртта. Велигден ни носи порака за љубов и разбирање, помагање и поддршка. Тоа е и основата на Христијанството, кое со години му дава дух на македонскиот народ.

Да се помолиме за подобри времиња и надминување на сите премежја, какво е и ова со кое се соочуваме.

Велигден го славиме кога човештвото се соочува со голема закана.

Во ова време-невреме, да си помагаме, чуваме најблиските и себеси. Да останеме разумни и да ги почитуваме препораките. Со тоа ги почитуваме и нашите роднини, пријатели – нашите најблиски.

Нека овој празник ви донесе љубов, среќа, разбирање, здравје и благосостојба.

Само така ќе не` биде како народ, сплотен и нескршлив.

Секогаш ваш,
Љубе Бошкоски